وەنەوشە
وەنەوشە گوڵێکی بۆن خۆشە لە وەرزی بەهاردا دەڕوێت، گوڵی وەنەوشە یەکێکە لەو گوڵانەی کە بەهۆی سوودە تەندروستیەکەیەوە بۆ زۆر مەبەست بەکاردێت، وە هەر لە کۆنەوە هەبووەو ڕواوە.
بەشی بەکارهاتوو: گوڵ و گەڵاکەی، ووشک دەکرێتەوە لە سێبەر نەوەک لەبەر تاوی خۆر.
 |
| گولی وەنەوشە |
مێژوو و سەرچاوەی
نزیکەی ٢٠٠ جۆری هەیە، لە نێوان ناوچە کەمەری و مامناوەندیەکانە، چەند جۆر لە پەپوولەش هەیە لەسەر ئەو وەنەوشەیە دەژی.
وەنەوشە لە کتێبەکانی (هۆمیرۆس) و (فیرجیل) ناوی هاتووە، خەڵکی شاری ئەسینای پایتەخت بەکاریان هێناوە وەک هێمنکەرەوەیەکی توڕەبوون و خەو لێکەوتن و دڵ ئاسوودەیی و بەهێزکردنی.
(پلینی) نووسەری ئەگریکی باس لەوە دەکات کەوا ڕەگی وەنەوشە و هەندێ خەل کراوەتە مەرهەم و بۆ نەخۆشی شاهانە و نەخۆشییەکانی سپڵ بەکارهاتووە، ئەگەر لەسەر سەر دابنرێت بۆ سەرئێشە و سەرسوڕان باشە.
لەسەردەمی ناپلیۆن وەنەوشە بەکارهاتووە لەگەڵ خواردن و تاوەکو ئێستاش ئەو عادەتە هەر ماوە.
لەسەردەمی ڕۆمەکانەوەش گوڵە وەنەوشە بەکارهاتووە وەک شەراب بە شێوەیەکی بڵاو.
لەسەردەمی ئێستاماندا وەنەوشە بەکارهاتووە بۆ ڕەنگ کردن و پیشەسازی بۆن و بەرام، هەروەها بەکاردێت بۆ کاری پزیشکی بۆیە بەشێوەیەکی بەربڵاو لە بەریتانیا دەچێنرێت.
وەنەوشەی کێوی بەهێزترە لەوەی کشتوکاڵی بەڵام لەبەر کەمی خۆماڵیەکە بەکاردێت.
گەورەترین کێڵگەی وەنەوشە لە ناوچەی نایسی فەڕەنسایە.
پێکهاتەکەی
- بەشە گرنگەکەی بریتیە لە گوڵەکەی کەوا بۆن دەدات و ڕەنگی وەنەوشەیەکی کاڵە، بەتایبەتی کاتێ لەناو ئاوی گەرم دادەنرێت. لەڕووی کیمیاویشەوە ئەو ڕەنگە بەهۆی بوونی ماددەیەک لە خێزانی (گلۆکۆساید) بەناوی (ڤایۆلا کورسیتین - Viola quercitin), سوودە پزیشکیەکەش هەر لەو ماددەیە
- ماددەی سەلایسیلیک ئەسیدی تیایە بۆ دروستکردنی حەبی ئەسپرین و ئەسپرۆ بەکاردێت
- ماددەیەکی تفتی تیایە بەناوی (ڤایۆلین - Violin)
بەکارهێنان و سوودەکانی
- لەگەڵ سەوزە بەکاردێت بۆ سەڵاتە
- بۆ ڕەوانی باشە
- بۆ نەخۆشیەکانی سەرمابوون (هەڵامەت و گیرانی لووت) و سیەکان و بۆڕییەکانی هەوا باشە
- هێمنکەرەوەی دڵ و دەروونە
- چالاکی جگەر زیاد دەکات
- بۆ زۆربەی نەخۆشیەکانی دڵ بەکاردێت (بۆڕییەکانی خوێن و ماسولکەکانی)
- بۆ سەرئێشە و شەقەسەر باشە
- بۆ چارەسەری خێرای برین و هەوکردن باشە
- میزکردن زیاد دەکات و بەردیش دەتوێنێتەوە
- لێکۆڵینەوە هەیە لەسەر ئەوەی گوایە بۆ پاککردنەوەی برین و هەوکردن باشە
- بۆ نەخۆشی شێرپەنجەو ئازارەکانی بەکاردێت بەتایبەتی ئەوەی مل و گەردن
إرسال تعليق